¶ The vij fable is of a fyſſher
Lle thynges which ben done & made
in theyr tyme & ſeaſon ben wel
made / as by this preſent fable it
appereth Of a fyſſher whiche ſomtyme
touched his bagpype nyhe
the Ryuer for to make the fyſſhe to daunce /
¶ And whan he ſawe that for none ſonge that
he coude pype / the fyſſhes wold not daūſe / As
wroth dyd caſt his nettes in to the Ryuer / & toke
of fyſſhe grete quantite / And whanne he had
drawe oute his nettes oute of the water / the
fyſſhe beganne to lepe and to daunſe / and thenne
he ſayd to them / Certaynly hit appiereth now
wel / that ye be euylle beeſtes / For now whanne
ye be taken / ye lepe and daunſe / And whanne
I pyped and played of my muſe or bag pype ye
dayned / ne wold not daunſe / Therfore hit appiereth
wel that the thynges whiche ben made
in ſeaſon / ben wel made and done by reaſon
