¶ The thyrd fable is of the two Creuyſſes
E whiche will teche and lerne ſome
other / ought firſt to corryge &
examyne hym ſelf / as it appereth
by this fable of a creuyſſe / whiche
wold haue chaſtyſed her owne
doughter bicauſe that ſhe wente not wel ryght /
And ſayd to her in this manere / My doughter /
hit pleaſeth me not that thow gooſt thus backward
/ For euylle myght wel therof come to the /
And thenne the doughter ſayd to her moder My
moder I ſhalle go ryght and forward with a good
will but ye muſt goo before for to ſhewe to me
the waye / But the moder coude not other wyſe
goo / than after her kynd / wherfore her doughter
ſayd unto her / My moder fyrſt lerne your ſelf
for to goo ryght and forward / and thenne ye
ſhalle teche me And therfore he that wylle teche
other / ought to ſhewe good enſample / For grete
ſhame is to the doctour whanne his owne coulpe
or faulte accuſeth hym
