¶ The xix fable is of the lyon and of the gote
e is wyſe that can kepe hym ſelf
from the wyly and fals / as hit
appereth by this fable / Of a lyon /
whiche ones mette with a gote /
whiche was vpon a montayne
And whanne the lyon ſawe her / he ſayd to her
in this manere / For to gyue to her occacion to
come doune fro the hylle / to thende that he
myght ete her / My ſuſter why comeſt thow not
hyder on this fayre and grene medowe for to ete
of theſe fayre herbes or graſſe / And the gote
anſuerd to hym / How be hit / that thow ſayſt
trouthe / Neuertheles thow ſayſt it not / neyther
for my wele ne for my prouffyte / but thow ſayſt
hit / by cauſe that thow woldeſt fayne ete and
deuoure me / but I truſte not in thy fayre ſpeche /
For many tymes I haue herd ſaye of my graūt
moder / he that is wel / meue not hym ſelf / For
he whiche is in a place wel ſure / is wel a fole to
go fro hit / and to putte hym ſelf in grete daunger
and perylle
