¶ The fyrſt fable maketh mencion of thexhortacion of ſapyence or wyſedome and of loue
Rabe of Lucanye ſayd to his ſone in
this maner / My ſone beware &
loke that the formyce be not
more prudent or wyſer / than
thy ſelf / the whiche gadreth &
aſſembleth to gyder in the ſomer all that to
her nedeth to haue in the wynter / and beware
that thow ſlepe no lenger / than the Cocke
doth the whiche watcheth and waketh atte matyns
tyme / and that he be not wyſer and more ſage
than thy ſelf / the whiche rewleth and gouerneth
wel ix hennes / but hit ſuffyſeth wel / that thow
rewle and gouerne one wel / And alſo that the
dogge be not more noble than thy ſelf / the
whiche forgeteth neuer the good whiche is done
to hym / but euer he remembryth it / ¶ Item my
ſone ſuppoſe it not a lytyll thynge to haue a good
Frend but doubte not to haue a thowſand frendes /
¶ And whanne A rabe wold deye / he demaunded
of his ſone / My ſone how many good frendes
hast thow / And his ſone anſwerd to hym / My
fader I haue as I ſuppoſe an honderd frendes /