Page:The fables of Aesop, as first printed by William Caxton in 1484, with those of Avian, Alfonso and Poggio. Vol 2.djvu/273

 

and holden for a good man and trewe / And therfore retorne ageyne to hym / and by ſwete wordes telle hym that he wyl rendre to the thy good ageyne / the whiche thynge he dyd / and the old man anſuerd to hym more ſharpely and wonderly than he had done before / wherof the ſpaynard was wonderly wrothe / And as he departed oute of the old mans hows / he mette with an old woman / the whiche demaunded of hym / wherfore he was ſoo troubled and heuy / And after that he had told to her the cauſe why / thold woman ſayd to hym / make good chere / For yf hit is ſo as thow ſayſt / I ſhalle counceylle the how thou ſhalt recouere thy ſyluer / And thenne he demauded of her / how hit myght be done / And ſhe ſayd to hym bryng hyther to me a man of thy country whome thow truſteſt / and doo to be made four fayre cheſtes / and fylle them alle with ſtones / and by thy felawes thow ſhalt make them to be borne / in to his hows / and to hym they ſhalle ſay / that the marchaūts of ſpayne ſend them to hym for to kepe ſurely / And whan the cheſtes ſhalle be within his hows / thow ſhalt go and demāde of hym thy ſyluer / whiche thynge he dyd / And as the ſayd cheſtes were borne within his hows / the ſpaynard wente with them / that bare them / the whiche ſtraungers ſayd to the old mā My lord / theſe