Page:The fables of Aesop, as first printed by William Caxton in 1484, with those of Avian, Alfonso and Poggio. Vol 2.djvu/277

 

charyte / that he wold gyue to hym good coūceylle of his grete nede / & he reherced and told to hym al his cauſe & ſwore vpon the holy euangely that he toke none of the ryche mans oylle / And thenne the philoſopher anſuerd to hyſ in this manere / My ſone / haue no fere / for the trouthe may not faylle / And the next morowe after / the philoſopher wente with the poure man in to Jugement / the whiche philoſopher was conſtitued by the kynge for to gyue the Juſt ſentence of hit / And after that the cauſe had be wel deffended and pleted by bothe partyes / the philoſophre ſayd / the ſame ryche man is of good renommee / and I ſuppoſe not that he demaunded more than he ſhould haue / And alſo I byleue not that this poure may be maculed ne gylty of the blame / which he putteth on hym / but notwithſtondynge for to knowe the trouthe of hit / I ordeyne and gyue ſentence / that the oylle pure and clene of the v tonnes whiche are ful to be meſured / and alſo the lye therof / And after that the pure and clene oylle of the fyue which been but half ful to be alſo meaſured / and with the lye thereof / and that men loke yf the lye of the fyue Tonnes half ful is egal and lyke to the lye of the fyue Tonnes / whiche ben fulle / And yf hit be not soo / that as moche lye be fond within the

veſſels whiche ben but half full as in the other /