¶ The fourthe fable maketh mencion of the ſentence gyuen up the pecuny or money whiche was found.
Ryche man ſomtyme wente by a
Cyte / And walked fro one
ſyde to that other / fylle fro hym
a grete purſe / wherin were a
thouſand Crownes / the whiche a
poure man fond / and toke them for to kepe to
his wyf / wherof ſhe was ful gladde / and ſayd /
thanked be god of al the goodes whiche he
ſendeth to vs / yf he ſendeth now this grete
ſomme kepe we hit wel / And on the next morne
after folowyng / the Ryche man made to be
cryed thurgh the cyte / that who ſomeuer had
fond a thowſand Crownes in a purſe / he ſhold
reſtitue / and brynge them to hym ageyne / and
that he ſhold haue for his reward an honderd of
them / And after that the poure man had herd
this crye / he ranne Incontynent to his wyf / &
ſayd to her / My wyf / that / that we haue fond
muſt be rendred or yolden ageyne / For hit is
better to haue a C crownes withoute ſynne than
a thowſand with ſynne & wrongfully / And how
