Page:The fables of Aesop, as first printed by William Caxton in 1484, with those of Avian, Alfonso and Poggio. Vol 2.djvu/287

 

hit / he had be moche ryche / And fro his handes I had not leaped / And thenne the vylayne whiche herd this ſunge / beganne to complayne and to make grete ſorowe . and after ſayd I am wel vnhappy / that haue loſt ſo fayre a treſour / whiche I had wonne / and now I haue loſt hit / And the nyghtyngale ſeyd thenne to the chorle / Now knowe I wel that thow arte a fool / For thow takeſt ſorowe of that wherof thow ſholdeſt haue none / and ſone thow haſt forgeten my doctryne / by cauſe that thow weneſt that within my bely ſhold be a precious ſtone more of weyght than I am / And I told and taught to the / that thow ſholdeſt neuer byleue that thynge / which is Impoſſyble / And yf that ſtone was thyn / why haſt thow loſt hit / And yf thow haſt loſt hit and mayſt not recouere hit / why takeſt thow ſorowe for hit / And therfore hit is foly to chaſtyſe or to teche a fole / whiche neuer byleueth the lernynge and doctryne whiche is gyuen to hym.