and ſayd / I wyll wel / And thenne the old woman ſayd to her in this manere / My frend this ſame catte whiche thow ſeeſt yonder was my daughter / the whiche was wonder fayre gracious and chaſte / whiche a yonge man loued moche / and was ſo moche eſpryſed of her loue / that by cauſe that ſhe reffuſed hym / he deyde for her loue / wherfore the goddes hauyng pyte on hym / haue torned my daughter in to this catte / And the yonge woman whiche ſuppoſed that the old woman had ſayd trouthe ſayd to her in this manere / Allas my fayr moder / I ne wote what I ſhalle doo / For ſuche a caas myght wel happe to me / For in this Towne is a yonge man / whiche deyeth almoſt for the loue of me / But for loue of my huſband / to whome I oughte to kepe chaſtyte / I haue not wylle graunte hym / Neuertheles I ſhall doo that / that thow ſhalt counceylle to me / And thenne the old woman ſayd to her / My frend haue thow pyte on hym as ſoone as thow mayſt / ſoo that hit befalle not to the lyke as it dyd to my doughter /
¶ The yonge woman thenne anſwerd to her / and ſayd / yf he requyre me ony more / I ſhalle accorde me with hym / And yf he requyre me no more / yet ſhalle I profere me to hym / ¶ And to thende / that I offende not the goddes / I ſhalle doo and accomplyſſhe hit / as ſoone as I maye /
