¶ The ſecond fable is of the Columbes or douues of the kyte and of the ſperehawke
Ho that putte and ſubmytteth hym
ſelf vnder the ſaue gard or protection
of the euylle / thou oughteſt
to wete & knowe / that whan he
aſketh & demanded ayde & helpe /
he geteth none / ¶ Wherof Eſope reherceth to
vs ſuche a fable / Of the douues whiche demaunded
a ſperehawke for to be theyr kynge /
for to kepe them fro the kyte or mylan / And
whanne the ſperehawke was maade kynge ouer
them / he beganne to deuoure them / the whiche
columbes or douues ſayd amonge them / that
better it were to them to ſuffre of the kyte than
to be vnder the ſubjection of the ſperehawke /
& to be martyred as we be / but therof we be
wel worthy / For we oure ſelf ben cauſe of this
meſchyef / And therfore whanne men done ony
thyng / men ought well to loke and conſydere
thende of hit / For he dothe prudently and
wyſely whiche taketh good hede to the ende
