Page:The fables of Aesop, as first printed by William Caxton in 1484, with those of Avian, Alfonso and Poggio. Vol 2.djvu/84

 

ſore he held his pees as wyſ and ſage / And the hors wente his waye /  ¶ And within a lytyl whyl after / it befelle / that fortune tourned his whele vp ſodoune / For thys fayre hors became old lene and ſeke /  ¶ And whanne his mayſter ſawe that his hors was thus lene and ſeke and oute of proſperyte / he comaūded that he ſhold be had in to the toun and that in ſtede of his ryche ſadel men ſhold put and ſette on his backe a panyer for to bere dounge in to the feldes / Now it happed that the aſſe whiche was in a medowe etyng graſſe perceyued and ſawe the hors and wel knewe hym / wherof he was wonder abaſſhed / and merueylled moche that he was thus poure and ſo lene bycome /  ¶ And the aſſe went toward hym and ſayd / Ha a felawe. where is now thy fayre ſadel / and thy ryche brydel / garnyſſhed with gold / how arte thow now bycome ſoo lene and ſuche a payllard / what haue prouffyted to the thy fayre and ryche rayments / and what auaylled now to thy grete ſyerſte and pryde / and thy grete preſumpcion whiche ones thow ſheweſt to me / Thynke now/ how thow arte lene and vnthryfty / and how thow and I ben now of one offyce / And the myſerable and vnhappy hors was abaſſhed / and for ſhame loked dounward / & anſuerd neuer one word / for alle his felicitie was thenne

turned