"What found we? Be my sooth, we found a broken lock, an' toom kists."
"Relate some of the particulars, if you please."
"O, Sir, the thieves didna stand upon particulars: they were halesale dealers in a' our best wares."
"I mean, what passed between your mistress and you on the occasion?"
"What passed, say ye? O, there wasna muckle: I was in a great passion, but she was dung doitrified a wee. When she gaed to put the key i' the door, up it flew to the fer wa'.—'Bess, ye jaud, what's the meaning o' this?' quo she. 'Ye hae left the door open, ye tawpie!' quo she. 'The ne'er o' that I did,' quo I, 'or may my shakel bane never turn another key.' When we got the candle lightit, a' the house was in a hoad-road. 'Bessy, my woman,' quo she, 'we are baith ruined and undone creatures.' 'The deil a bit,' quo I; 'that I deny positively. H'mh! to speak o' a lass o' my age being ruined and undone! I never had muckle except what was within a good jerkin, an' let the thief ruin me there wha can.'"
