Page:Underwoods, Stevenson, 1887.djvu/106

This page has been validated.
82
UNDERWOODS

Or in the gloamin' douce an' gray
The sweet-throat mavis tunes her lay;
The herd comes linkin' doun the brae;
An' by degrees
The muckle siller müne maks way
Amang the trees.


Here aft hae I, wi' sober heart,
For meditation sat apairt,
When orra loves or kittle art
Perplexed my mind;
Here socht a balm for ilka smart
O' humankind.


Here aft, weel neukit by my lane,
Wi' Horace, or perhaps Montaigne,
The mornin' hours hae come an' gane
Abüne my heid—
I wadnae gi'en a chucky-stane
For a' I'd read.