7
Gin ye were waiting by the wood,
Then I was waiting by the thorn,
I thought it was the place we set,
And waited maist till dawning morn.
Sae be nae vex'd my bonnie lassie,
Let my waiting stand for thine,
We'll awa' to Craigton shaw,
And seek the joys we tint yestreen.
-------
WHEN JOHN AND ME WERE MARRIED.
WHEN John and me were married,
Our hading was but sma',
For my minnie, canker't carling,
Wou'd gi'e us nocht ava';
I wair't my fee wi' canny care,
As far as it wou'd gae,
But well I wat our bridal bed,
Was clean pease-strae.
Wi' working late and early,
We're come to what you see,
For fortune thrave aneath our hands,
Sae eydent aye were we.
The lowe of love made labour light
I'm sure ye'll find it sae,
When kind ye cuddle down at e'en,
'Mang clean pease-strae.
The rose blooms gay on cairney brae,
As weel's in birken shaw,
And love will lowe in cottage low,
As weel's in lofty ha'.
Sae, lassie take the lad ye like,
Whate'er your minnie say,
Tho' you should make your bridral bed
Of clean pease-strae.
