6
Mag. I ken well what I was to get, an gin my mither like the bargain weel, she'll mak it better; but an my father be angry at the bargain, I darna think of marrying.
Jock. I seena how he can be angry I wat well I'm a gay sturdy fellow, when I laid a bow and five pecks o' beer on the Laird's Bawsey, and he's as bilshy a beast as in a' the barony.
Mag. Ay, but my mither is aye angry at ony that evens themselves to me, an' it binna them she likes, indeed she bade me tak ony body, if it wasna auld tottering Tammy; for his beard is aye brown wi' sucking Tobacco, and slavers a' the breast o' his fecket.
Jock. Oh, Maggy, tak me an I'll tell you what I hae: First, my father left me when he died, fifty merks, twa sacks, twa pair of sunks; the hens and the gaun gear was to be divided between me and my mither, and if she died first, a' her gear was to come in among mine, and if I died before her, a' my gear was to come back to her again, and her to marry anither man if she could get him
