THE TWENTY-THIRD PSAUM.
Dauvid is ayw unreelin a pirn about Christ. Here he pents him as a Sheperd, and his sel as a silly bit lammie. It eerens weel wi the tenth o' John.
THE Lord is my Shepherd; my wants are a' kent; the pasture I lie on is growthie and green.
I follow by the lip o' the watirs o' Peace.
He heals and sterklie hands my saul: and airts me, for his ain name's sake, in a' the fit-roads o' his holiness.
Aye, and though I buds gang throwe the howe whaur the deid-shadows fa', I'se fear nae skaith nor ill, for that yersel is aye aside me; yere rod and yere cruik they defend me.
My table ye has plenish't; afore the een o' my faes; my heid ye has chrystit wi' oyle; my cup is teemin fu'!
And certes, tenderness and mercie sal be my fa' to the end o' my days; and syne I'se bide i' the hoose o' the Lord, for evir and evir mair!
