For other versions of this work, see The Land of the Leal.
THE LAND O' THE LEAL.
Air,—"Bruce's Address.
I'm wearing awa, Jean,
Like snaw when its thaw, Jean:
I'm wearing awa
To the land o’ the leal.
There's nae sorrow there, Jean,
There' nae cauld nor care, Jean,
The day is aye fair
In the land o' the leal.
Ye were aye leal and true Jean,
Your tasks ended now, Jean,
And I'll welcome you, Jean,
To the land o’ the leal,
Our bonny bairn's there, Jean,
She was baith gude and fair, Jean,
And we grudg'd her right sair,
To the land o’ the leal.
Oh! dry that tearfu' ee, Jean,
My soul longs to be free, Jean,
And angels wait on me
To the land o' the leal.
Now fare ye weel, my ain Jean,
This warld's care is vain, Jean,
We'll meet and aye be fain
In the land o' the leal.