Tak your auld cloak about ye/Willie was a wanton wag

Tak your auld cloak about ye (1800s)
Willie was a wanton wag
3279885Tak your auld cloak about ye — Willie was a wanton wag1800s


Willie was a wanton wag,
the blythest lad that e'er I saw,
At bridals still he bore the brag,
and carried a the gree awa',
His doublet was of Zetland shag,
and wow! but Willie he was braw;
And at his shouther hung a tag,
that pleas'd the lasses best of a'.

He was a man without a clag,
his heart was frank, without a flaw:
And ay whatever Willie said,
it was still hadden as a law.
His boots they were made o' the jag,
when he gae'd to the weapon-shaw;
Upon the green nane durst him brag,
the fiend a ane amang them a'.

And was na Willie weel worth gowd,
he wan the love of great and sma';
For after he the bride had kiss’d,
he kiss'd the lasses hale-sale a'.
Sae merr'ly round the ring they row'd,
when by the hand he led them a';
And smack on smack on them bestow'd,
by virtue o' a standing law.

And was na Willie a great loun.
as shyre a lick as e'er was seen?
When he danc'd wi' the lasses round,
the bridegroom speir'd whare he had been,
Quoth Willie, I've been at the ring,
wi' bobbing, faith, my shanks are sair;
Gae ca' your bride and maidens in,
for Willie he can dow do nae mair.

Then rest ye, Willie. I'll gae out,
and for a wee fill up the ring;
But shame light on his souple snout,
he wanted Willie's wanton fling.
Then straight he to the bride did fare,
says, well's me on your bonny face;
Wi’ bobbing, Willie's shanks are sair,
and I'm come out to fill his place.

Bridegroom, she says, you'll stick the dance,
and at the ring you'll ay be lag,
Unless, like Willie, ye advance;
O! Willie has a wanton wag:
For wi’t he sets us a’ steer,
and foremost ay bears up the ring;
We will find nae sic dancing here,
if we want Willie’s wanton fling.

This work was published before January 1, 1929, and is in the public domain worldwide because the author died at least 100 years ago.

Public domainPublic domainfalsefalse