The Black-bird/Sweet Anny frae the Seabeach came

by Anonymous

 

A

COLLECTION

OF

SONGS.

 

Sweet Anny frae the Sea-beach came.

Sweet Anny frae the sea-beach came,
 where Jocky speel’d the vessel’s side;
Ah! wha can keep their heart at hame,
 when Jocky’s tost aboon the tide!
Far aft to distant realms he gangs;
 yet I’ll prove true, as he has been:
And when ilk lass about him thrangs,
 he’ll think on Anny, his faithful ain.

I met our wealthy laird yestreen,
 wi’ goud in hand he tempted me;
He prais’d my brow, my rolling een,
 and made a brag of what he’d gi‘e:
What tho’ my Jocky’s far away,
 tost up and down the dinsonie main,
I’ll keep my heart anither day,
 since Jocky may return again.

Nae mair, false Jamie, sing nae mair,
 and fairly cast your pipe away;
My Jocky wad be troubled sair,
 to see his friend his love betray:
For a’ your songs and verse are vain,
 while Jocky’s notes do faithful flow;
My heart to him shall true remain,
 I’ll keep it for my constant jo.

Blaw saft, ye gales, round Jocky’s head,
 and gar your waves be calm and still;
His hameward sail with breezes speed,
 and dinna a’ my pleasure spill.
What tho’ my Jocky's far away,
 yet he will braw in siller shine:
I’ll keep my heart anither day,
 since Jocky may again be mine

 

---

---