My sweet wee laddie.
[Robert Jamieson.]
O blessings attend my sweet wee laddie,
That blinks sae bonnily now on my knee;
And thousands o' blessings attend on his daddie,
Tho' far awa' now frae his babie and me.
It's aft ha'e I sitten, and sair ha'e I grutten,
Till blear'd and blinded wi' tears was my e'e;
And aft I bethought me, how dearly I've bought thee;
For dear hast thou been, and dear art thou to me.
Yet blessings attend, &c.
O lanely and weary, cauld, friendless, and dreary,
To me the wide warld's a wilderness a';
Yet still ae dear blossom I clasp to my bosom,
And oh! 'tis sae sweet—like the joy that's awa'!
And blessings attend, &c.
When thou lyest sleeping I hang o'er thee weeping,
And bitter the tears that thy slumbers bedew;
Yet thy innocence smiling, sae sweetly beguiling,
Half mak's me forget that I sorrow e'er knew.
And blessings attend, &c.
Then smile, my sweet laddie—O smile like thy daddie;
My heart will be light tho' the tear's in my e'e;
I canna believe he will ever deceive me,
Sae leal and sae kind as he kythed aye to be.
And blessings attend, &c.
And O, 'mid my mourning to see him returning!—
Wi' thee to his arms, when with rapture I fly—
Come weal or come wae then, nae fear I can ha'e then,
And wha'll be sae blest as my babie and I!
Then blessings attend, &c.