The Booke of Thenseygnementes and Techynge that the Knyght of the Towre made to his Doughters/Chapter 18
OF THE WOMAN THAT GAF THE FLESSHE TO HER HONNDES.
SHAL saye to yow an Ensample of a lady that yaf the flesshe and good morsels to her lytell houdes. Ther was a lady whiche hadde two small houndes, whome she moche loued and had soo derworthe that she took in them greete playsaunce. She made for them dayly dysshes of sowpes, and after gaf to them flesshe and other fryandyses delycyous. And on a tyme there was a frere mendycaunt that said to her that it was euyll done to gyue suche metes to the houndes, that were grete & fatte, where as there were moche poure peple lene and drye for hogre. Thus he prechyd, vnto the lady, but for al that she wold not leue it. Soo thenne a lytel afterward this lady bycam seke vnto the deth, and ther happed a wonder thyng whiche was sene al apertely. For ther cam vpon her bed two lytel black dogges, and whan she drewe on and was in a traunce they were about her mouthe and lycked her lyppes. And where as they lycied her on the mouthe it bycam as black as a Cole. This I haue herd of a damoyselle that said that she had sene al this, and named to me the lady. This is a good ensample to euery good lady and woman, how they ought not to haue ouer grete plaisyre in suche thynges, ne to geue flesshe ne lychorous metes to the houdes, for lack of whiche the poure peple of god dye for honger, the whiche ben the creatures of god made to his semblaunce and lykenes, and be his seruauntes. Suche wymmen vnderstande not the word of god in the gospel, where as god sayth, "He that dot wel to the poure doth to me seruyce.” These wymmen resemble not vnto the good quene blache, that was moder of sayni lowys, whiche dyd do gyue in hir syght the mete to the moost nedy and meseased. And after saynt lowys dyd in lyke wyse, for he vysyted the poure peple and fedde them with his own honde. The Plaisire of euery good woman is to see the faderles and moderles children and lytel poure children and them norysshe and clothe, as dide the holy lady that was Countesse of Mauns, whiche norysshed wel thyrtty orphanes and the lytel poure children for pyte, and therin was al hir disporte. And therfor she was louyd of god and had an holy lyf and a goode ende. And ther was, sene at her deth a grete clercnes and lyght alle full of lytel children. These were not the smale houndes that were black whiche were sene with the other, as ye haue herd to fore.