The Booke of Thenseygnementes and Techynge that the Knyght of the Towre made to his Doughters/Chapter 28
HOW GOD SPRANGE IN TO THE MOUTHE OF A HOOLY LADY.
OW I shalle telle yow vpon this matere of a good lady whiche was hooly of lyf and moche loued god & his seruyse. And that day that she herd no masse, she ete neither flesshe ne fysshe, so euyll at ease was she at her herte. So it happed on a tyme that her chappellayn was in suche wyse seke that he myght not synge The good lady was not wel at ease att her herte, by cause she had lost her seruyse, and walked out of her Castel sayenge, "O good lorde, forgete vs not, but plese hit the to pourueye to vs that we may here the holy seruyce!" And in sayeng these words, she sawe two freres of relygyon comying, of whom she had grete ioye. And anon she demaūded yf they had said masse, and they said "Nay." And she desyred them to synge, and they saide, " Gladly, yf it please god." And when the good lady herd that, she thanked god. And the yonger songe first. And thenne whan he had made thre pyeces of the sacrament, the olde frere beheld it, and sawe one of the partes spryng in to the mouthe of the good lady in maner of a lytel bryght clerenes. The yonge frere loked all aboute where hit was become, and that other trembled for fere and sorowe of his felawe, and cam to hym and sayd that he sholde not be dismayed, for that he sought was in the mouthe of the good lady. Thenne was he wel assured, and thanked god of the myracle that thus happed to this good lady that so moche louyd the seruyce of god. Loo, my faire doughters, this is a good ensample for you certayn. They that love god in his seruyse, god loueth them, as it is shewed appertely by this good lady, whiche had so grete desyre to see hym and here his seruyse as afore is said.