The fables of Aesop by William Caxton (Jacobs)/Vol. II/Other Aesop's/Fable 7
¶ The vij fable is of a fyssher
Lle thynges which ben done & made
in theyr tyme & season ben wel
made / as by this present fable it
appereth Of a fyssher whiche somtyme
touched his bagpype nyhe
the Ryuer for to make the fysshe to daunce /
¶ And whan he sawe that for none songe that
he coude pype / the fysshes wold not daūse / As
wroth dyd cast his nettes in to the Ryuer / & toke
of fysshe grete quantite / And whanne he had
drawe oute his nettes oute of the water / the
fysshe beganne to lepe and to daunse / and thenne
he sayd to them / Certaynly hit appiereth now
wel / that ye be euylle beestes / For now whanne
ye be taken / ye lepe and daunse / And whanne
I pyped and played of my muse or bag pype ye
dayned / ne wold not daunse / Therfore hit appiereth
wel that the thynges whiche ben made
in season / ben wel made and done by reason