The fables of Aesop by William Caxton (Jacobs)/Vol. II/Liber Secundus/Fable 13
¶ The xiij fable is of the foxe and of the storke
How oughtest not to doo to other
that whiche thow woldest not that
men shold doo to the / wherof
Esope reherceth to vs suche a
fable / Of a foxe whiche conueyed
a storke to souper / And the foxe put the mete
vpon a trauncher / the whiche mete the storke
myght not ete / wherof she tooke & had grete
displaysaunce / & wente & departed oute of the foxes hows al hungry and wente geyne to her
lodgys / and by cause that the foxe had thus
begyled her / she bythoughte in her self / how
she myght begyle the Foxe / For as men saye /
it is meryte to begyle the begylers / wherfore the
storke prayd the foxe to come and soupe with
her / and put his mete within a glas / And
whanne the foxe wold haue eten / he myght not
come ther by / but only he lycked the glas / by
cause he cowde not reche to the mete with his
mouthe / And thenne he knewe wel that he was
deceyued / And thenne the storke sayd to hym /
Take of suche goodes as thow gauest to me /
And the poure foxe ryght shameful departed fro
thens / And with the staf whiche he had made
he was bete And therfore he that begyleth other /
is oftyme begyled hym self /