Ælfric's Lives of Saints/04iul

Ælfric's Lives of Saints by Ælfric, translated by Walter W. Skeat
Passion of St. Julian and his Wife Basilissa


idvs ianvarii. passio sci̅ ivliani et sponse eivs basilisse.

ivlianvs ƿæs gehaten · sum æðele godes ðegn ·001
on
egypta lande · on antiochian þære byrig ·

Se ƿæs æðel-boren of æƿfestum magum ·003
⁊ on cristes lare ge-læred · fram geogoþe.

Þa ƿolde his fæder · ⁊ his frynd ealle ·005
 he ƿifian sceolde þa ða he eahtetyne gæra ƿæs ·
ac iulianus cƿæð  he cunnian ƿolde
his drihtnes ƿyllan hu he ƿolde be him ·

He ƿearð þa ge-bysgod on his ge-bedum seofan niht ·009
bæd þone ælmihtigan crist  he his clænnysse geheolde ·

Ða æt-eoƿde se hælend hine sylfne on sƿefne011
þā æþelan cnihte on ðære eahteoðan nihte ·
⁊ cƿæð  he sceolde soðlice underfon mæden
him to gemacan · þe hine ne moste ascyrian
fram his clænan lufe þe he gecoren hæfde ·

Se hælend him cƿæð to ·016

Ic beo sylf mid þe ·016
⁊ on þe adƿesce ealle ontendnysse ·
⁊  mæden ic ge-bige · eac to minre lufe ·
⁊ on eoƿrū bryd-bedde · ic beo eoƿ æt-eoƿed ·
⁊ þurh eoƿ me bið ge-halgod manegra oðre clennysse
| ⁊ ic þe under-fo mid ðinū mædene to heofonū ·

Ða aƿóc Iulianus geƿyssod þurh his drihten ·022
cƿæð to his freondum ·  he on-fon ƿolde ·
mæden him to gemacan · ⁊ hi mycclū þæs fægnodon ·

Þa fundon his magas sum æðel-boren mæden025
basilissa gehaten · ⁊ him þa begeaten ·

Þa ƿurdon gegearcode þa gyftu æfter geƿunan ·027
⁊ hí butu coman on anum bedde to-somne.

Hƿæt ða iulianus hine georne ge-bæd ·029
to ðam hælende criste ·  he hine geheolde ·
ƿið ealla ontendnysse · ⁊ yfele costnunga ·

Ða ƿearð  bryd-bed mid bræðe afylled ·032
sƿylce þær lægon · lilie ⁊ rose ·

Ða cƿæð basilissa to þam clænan brydguman ·034

Hit is ƿinter-tid nu ⁊ ic ƿundrie þearle035
hƿanon þes ƿyrt-bræð þus ƿynsūlice steme ·
⁊ me nu ne lyst · nanes synscipes ·
ac þæs hælendes geþeodnysse mid ge-healdenre clennisse ·

Iulianus andƿyrde þam æðelan mædene ·039
þes ƿynsuman bræð þe ðu ƿundrast þearle ·
næfð nan angin · ne eac nænne ænde ·

Þes bræð is of criste seðe is clænnysse lufigend ·042
gif ƿit þurh-ƿuniað on ansundum mægð-hade ·
⁊ hine clænlice lufiað · þonne cume ƿit to his rice ·
⁊ ƿit ne beoð to-tƿæmede · ác á to ƿorulde blyssiað ·

Basilissa cƿæð ·  heo on clænū mægð-hade046
þurh-ƿunian ƿolde · for ðam ƿynsuman behate ·
⁊ habban  ece lif · ⁊ ðone hælend to bryd-guman ·

Þa clypode iulianus on cneoƿ-gebedū ðus ·049

Confirma hoc deus · quod operatus es in nobis · et reliqua.050

Gefæstna þis hælend ·   ðu on ús geƿyrcst ·051
⁊ basilissa sona sƿa ge-lice dyde ·

Þa astyrede  bryd-bed · ⁊ beorht leoht þær scéan ·053
| ⁊ crist ƿearð geseƿen mid scinendū ƿerode ·
⁊ his modur maria mid hyre mædenlicum heape ·

Crist clypode þa to ðam clænan cnihte ·056
⁊ cƿæð  he hæfde ofersƿiðod
ƿoruldlice gælsan · ⁊ þone gramlican feond ·

Of marian ƿerode ƿæs þus geclypod ·059

Eadig eart þu basilissa · forþan þe þu gebygdest060
þin mod to halƿendū mynegungū ·
⁊ middan-eardlice sƿæsnysse mid ealle forsihst ·
⁊ þe sylfe gearcost to ƿuldre ·

Þa cō to ðam bedde boc fram þam hælende ·064
⁊ tƿegen his halgan mid tƿam cynehelmū ·
arærdan hi þa úpp · ⁊ heton hí rædan ·

Ða rædde iulianus þas ƿord on þære béc ·067

Se þe for minre lufe middan-eard forsihð ·068
he bið soðlice geteald to þam unbesmitenum halgū ·
þe næran on heora life besmitene mid ƿifū ·

Basilissa bið geteald to þæra mædena getæle071
þe marian folgiað þæs hælendes meder ·

Æfter þissere rædinge · ⁊ oðrū tihtingū ·073
ge-ƿendon þa halgan to þam hælende úpp ·

Hƿæt þa iulianus ungeƿæmmede heold his bryde ·075
⁊ hi ƿæron geðeodde mid soðre clænnysse
gastlice þeonde on godes geƿytnysse ·

Heora fæderas ƿæron gefyrn cristene ·078

Hit gelamp þa raðe ·  hi of life geƿytan ·079
⁊ læfdon heora æhta þam æðelū mannū ·

Iulianus þa dælde · be his drihtnes ƿyssunga081
heora land are · þe him læfed ƿæs ·
⁊ arærde him mynster ⁊ his mædene oðer ·

He ƿearð þa fæder ofer fæla muneca ·084
⁊ basilissa modor ofer manega mynecena ·
⁊ hí þa gastlican ƿerod under gode geƿyssodon ·
on dæg-hƿamlicre lare to heora dryhtnes ƿyllan ·
oþ  se reðe æhtnysse on egypta lande becom ·
fram þam | ƿel-hreoƿan casere þe ƿæs geciged dioclytianus ·

Þa gebædon · þa halgan hí to þam hælende ·090
⁊ he him asende þisne frofer þus cƿæðende ·

Eala þu basilissa þine gebedu synd gefyllede092
 ealle þine mædenu of middan-earde geƿitað
ær ðan þe seo arlease ehtnys · ofer eoƿ be-cume ·
 ge ne beon ge-ƿem-mede · þurh ða ƿodan ehteras ·

Hit ƿearð þa gefylled · sƿa sƿa him fore-sæde god ·096
 ealle ða femnan þe folgodon basilissan
geƿytan of ƿorulde to þam ƿuldor-fullan hælende ·
⁊ basilissa siððan soðlice gelaðod ·
geƿat on mægðhade of middan-earde to criste ·
⁊ iulian᷒ mid blisse hí bebyrgde mid his munecum ·

And [sic @ Skeat] he abád on life mid his leofan gebroðrū102
tihtende hí geornlice · to ðam to-ƿerdan gecampe ·

Ða com martianus se man-fulla cƿællere ·104
Into antiochian þære egyptiscan byrig ·
mid ormettre ehtnysse · fram þam arleasan casere ·

He sette ða gebann þæt nan mann bicgan ne moste ·107
oððe ænig þing syllan buton he onsæged-nysse ·
geoffrode þam leasū deofol-gyldum · ⁊ his drihten ƿið-soce ·

Him ƿearð þa ge-sæd · be ðam soðan geleafan ·110
þe Iulianus heold mid his halgū gebroðrum ·
⁊ sende to ðam heape het hi gebugan
to his deofolgyldum · þe læs þe hí for-demede ƿurdon ·

Ac Iulianus ne rohte þæs reðan þyƿrace ·114
ne nan his geferena forht næs on mode ·
ac ƿæron lust-bære for þone leofan drihten
ƿita to þroƿienne · ⁊ eac ƿælhreoƿne deað ·

Þa ge-cyrde se ærendraca · ⁊ þis sæde þam deman ·118

Martianus þa het þone halgan Iulianū119
him to ge-langian to langsumū ƿytum ·
⁊ het siððan for-bernan ealle his gebroðra ·
samod binnan | þam ylcan huse · þe hi heora beda be-eoden ·

Þa ƿearð se halga heap þam hælende ge-offrod ·123
⁊ þurh  hate fýr to heofonan rice becóm ·

On ðere stoƿe beoð gehælede · gehƿilce untrume ·125
þurh þæra martyra ge-earnunga · þe on þære stoƿe ðroƿodon ·

Hƿæt ða martianus se manfulla cƿellere ·127
hæfde langsū geƿinn · ƿið þone æðelan Iulianū ·
⁊ cƿæð  he geare ƿiste his æðelborennysse ·
⁊ ic þe for-ði tihte ·  ðu þam godū ge-offrige ·
æfter þinre gebyrde ·  hi þe blyðe beon ·

Iulianus him sæde · þu eart soðlice ablend132
mid þinre yfelnysse · ⁊ for-þi me þus olæcst ·

Ge habbað manega godas · ⁊ manega gydena ·134
ƿe soðlice ƿurðian ænne soðne god ·

Eoƿer godas synd agotene · oððe agrafene ·136
hu magon hi beon ge-gladode · þurh ænige bigencgas ·
oþþe þam gemyltsian · þe hí mid ge-dƿylde ƿurðiað ·

Þeos race is sƿiðe lang-sū fullice to gereccenne ·139
ac ƿe hit sæcgað eoƿ on þa scortostan ƿisan ·

Hƿæt þa martianus · het his manfullan cƿelleras ·141
þone halgan beatan mid heardū saglum ·

Þa bærst sum sagol into anes beateres eagan ·142
sƿa  his eage ƿand út mid þam slæge.

Se man ƿæs þam deman þearle nyd-behefe ·144
⁊ cuð þam casere · ⁊ him eallum ge-cƿeme ·

Ða cƿæð martian᷒ mid mycclū graman ·146
sƿa micel is þin dry-cræft ·  ðu þas dyntas naht ne gefretst ·
⁊ þærto eacan ablendst · þone þe þe beaton (sic) sceolde ·

Iulianus þa cƿæð · to þam ƿel-hreoƿan þus ·149

Clypiað to eoƿrū godum · ⁊ to eallum gydenū ·150
 hí nu gehælan · þises hæðenan eage ·
⁊ gif hí ne magon · ic hine gehæle þurh crist ·

Þa eoden þa hæðen-gyldan · | into heora temple ·153
clypigende hlude · to ðam leasan gode ·

Ða andƿerdan þa deofla · of þam dædan anlicnyssum ·155

Geƿitað frā us · ƿe synd ƿraðe ge-sƿæncte156
⁊ mid fyre for-numene · for Iulianes intingan ·
æfre fram ðam dæge þe ge hine ærest dræhton ·

Hú mage ƿé blinde þone blindan ge-hælan ·159

Þa cƿæð Iulianus þe  eal ƿyste ·160
to martiane · mid micelre blisse.

Gang into þinū godum þe hí clypiað to him ·162

Þa eode se ehtere into ðam temple ·163
⁊ ge-seah þa anlicnyssa ealle to-cƿysede
gyldena ⁊ sylfrena · ⁊ sume of smyltinga ·
Sume of cristallan to-brytte mid ealle ·

Þa sæde martianus  ða soðfæstan godes [sic @ Skeat]167
mid geþylde for-bæron · þone bysmorfullan teonan ·
 hí sƿa Iulianum to him ge-bigan mihton ·

He bæd sƿa þeah Iulianum ·  he his ge-beot gelæste ·170
⁊ þæs cnihtes eage þurh his crist ge-hælde ·

Þa mærcode Iulianus þæs mannes eage ·172
mid cristes rode-tacne · ⁊ se cniht ƿearð ge-hæled ·
sƿylce his eage nære næfre ær gederod ·

Ða clypode se cniht · ⁊ cƿæð to martiane ·175

Se god is to gelyfanne · þe ða cristenan ongelyfað ·176
⁊ þine godas synd soðlice deoflu ·

Martianus þa hét hine be-heafdian ·178
forðan þe he gelyfde · on þone lyfigendan god ·
þe his eage onlihte · ⁊ eac his heortan ·

He het eac gesƿencean mid sƿarū ƿitum ·182
þone halgan Iulianū · ⁊ het hine lædan
geond ealle þa burh gebundene mid racen-teagum ·

Martianus hæfde his sunu ær befæst ·184
to ƿoruld-licre lare · ⁊ to uðƿitegunge ·
on þære ylcan byrig · þe se gebundene eode ·

His nama ƿæs celsus · ⁊ se ge-seah þone halgan ·187
⁊ hu godes | ænglas him mid flugon ·
aƿearp þa his lár-bóc · ⁊ mid geleafan arn
to þam halgan ƿere · ⁊ his fét gesohte ·
cƿæð  he ƿiðsoce þā sceand-licū godum ·
⁊ crist andette mid ealre heortan ·

Ne mihte hine nan man of þam geleafan gebringan ·193
ne frā Iuliane · þurh ænig þing ateon ·

Þa ƿærð martianus ⁊ eac seo modor195
dreorige on mode · ⁊ heora men ealle ·
⁊ martianus befrán þone mæran Iulianum ·
hƿi ƿoldest þu amyrran min ancennedan sunu ·
þurh þinne dry-cræft · ⁊ to þinū criste geƿeman ·

Beheald ure sarnysse · ⁊ urne sunu forlǽt ·200
⁊ ic ðe geþingie to urum kasere ·

Celsus se sunu sæde þam sƿicolan fæder þus ·202

Ic ƿiðsace þe fæder for þinum gedƿylde ·203
⁊ ic gelyfa on crist þe me gecoren hæfð ·
ƿitna gif þu ƿylle · mid ƿæl-hreoƿum tintregum
þinne agenre (sic) sunu · for þinra goda bigencge ·

Gif þu nelle me of-slean · asend me to þam casere ·207
 ic þær deað þroƿige for minū drihtne criste ·

Þa halgan ƿurdon gebrohte on blindum cƿearterne syððan209
be martianes hǽse þær manna lic lagon ·
þe ƿæran ær acƿealde on ðam cƿearterne gefyrn ·
þa ƿeollon eall maðon · ⁊ egeslice stuncon ·

Þa fore-sceaƿode godes gifu ·  þær scean mycel leoht ·213
⁊ se stenc ƿearð aƿend · to ƿynsumū bræðe ·
⁊ eall se unƿynsumnyss him ƿearð to blysse ·

Þa cƿædon þa cempan þe se cƿellere gesette ·216
þam halgū to ƿeard-mannum · þæra ƿæron tƿentig ·

Unrihtlic us bið ·  ƿe æft gecyrron ·218
frā þysū beorhtan leohte · to blindum þystrū ·
frā life to deaðe · fram soðe to leasunga ·

Hi feollon þa ealle to Iulianes fotum ·221
mid ge-leafan herigende þæs hælendes naman ·

Iulianus þa bæd mid | onbryrdnysse his drihten ·223
 he fore-sceaƿode hu hi ge-fullode ƿurdon ·
þær ƿæron binnan þære byrig · seofan gebroðra cristena ·
þæs caseres cynnes · ⁊ heora fæder ƿæs cristen ·
þam alyfde se casere heora cristen-dom to healdenne ·
butan ælcere eht-nysse · for ðam arƿurðan cynne ·

Hi hæfdon ænne mæsse-preost sƿiðe mæres lifes ·229
antonius gehaten · þe him mæssan gesang ·

Þas geneosode se hælend · ⁊ hét hí gan to þam cƿearterne ·231
mid heora mæsse-preoste ·  þa men ƿurdon gefullode ·

Hi eoden þa on niht · ⁊ godes ængel hí lædde ·233
⁊  cƿeartern geopenade · mid his handa hrepunge ·

Þa sædon þa gebroðra ·  se hælend hi asende ·235
mid heora mæsse-preostæ · þa men to fullienne ·

Iulianus þa sona þæs þancode gode ·237
⁊ ƿearð þa ge-fullod se fore-sæda cnapa ·
⁊ his fæder cempan · on cristes naman endemes ·

Þis ƿæarð [sic @ Skeat] þa ge-cyd · þam cƿellere martiane ·240
 þa seofan gebroðra · butan ælcere ehtnysse ·
ƿoldan for cristes naman on þam cƿearterne þroƿian ·

Þa het se cƿellere hí · of þam cƿearterne gelædan ·243
⁊ axode hƿi hi ƿoldan butan ehtnysse þroƿian ·

Þa cƿæð se yldesta broðor · to þam arleasan deman ·245

Andsæte bið  treoƿ · þe æfre greƿð · on leafum ·246
⁊ næfre nænne ƿæstm · his scyppende · ne bringð ·
sƿa synd ƿe cristene · gif ure cristen-dóm · ne bið acunnod ·

Þa het se cƿellere hi to þam cƿearterne gelædan ·249
⁊ sende his geƿrit to þam ƿælhreoƿan casere ·

Gehelp urū godum · ⁊ hát to þe gefeccan ·251
þisne dry · Iulianum · þe ure góda anlicnysse ·
mid ealle to-brytte · ⁊ minne sunu gebygde ·
fram me to his criste · ⁊ þa seofan cnihtas ·
þe be þinre leafa lyfedan buton ehtnysse
on þyssere byrig for hyra mycclū | gebyrde ·
þa asende se casere þisne cƿide ongean ·
gif Iulianus þurh-ƿunað mid his geferum on þysum ·
nim fela tunnan ⁊ do hí þær on innan ·
on-æl hi siððan ealle oðrū mannum to bysne ·

And [sic @ Skeat] gif he þurh his dry-cræft  fyr adƿescan mæg ·261
geƿitna hi ealle loca hu þu ƿylle ·

Þa het martianus þa godes menn gefeccan ·263
⁊ axode Iulianū hƿeðer hí aht smeadon ·
ymbe hyre agene þearfe · on þære hƿile oðþæt ·

Iulian᷒ sæde · ure geþanc is · sƿa sƿa hit ƿæs ·266
gif þu ænig ƿíte beþohtest · ƿe synd gearƿe to þam ·

Þa mid þyssere spræce · bæron menn on ðære strǽt268
anes hæðenes mannes líc · ⁊ se heard-heorta dema ·
het beran þone deadan · to his dom-setle ·
cƿæð þa to Iuliane ·

Eoƿer crist arærde ·271
þa deadan to lífe · lǽt nu gesƿutelian ·
gif he soð god sy · ⁊ ge þisne aræran ·

Þa and-ƿyrde iulianus · þam arleasan deman ·274

Hƿæt fremað þam blindan seo beorhta sun-beam ·275

Is sƿa þeah tima  godes miht beo gesƿutelod ·276

Iulianus ða hóf to heofonum his eagan ·277
biddende his drihten ·  he þone deadan arærde ·

Þa æfter anre tida · arás se deade ·279
⁊ clypode ofer eall ·

Eala hu andfæncge gebed ·280
⁊ hu clæne mægð-hád · is on þisum mæran iuliane ·

Eala hƿider ic ƿæs gelæd · ⁊ hƿanon ic eom nu gebroht ·282

Þa het martianus mid his hosp-ƿordū ·283
þæt he ful sæde his sið him eallum ·

Þa cƿæþ se geeadcucoda · me coman to sil-hearƿan ·285
atelices hiƿes sƿa heage sƿa entes ·
mid byrnendū eagū · ⁊ egeslicum toðum ·

Heora earmes ƿæron sƿylce ormæte beames ·288
heora claƿa scearpe · ⁊ hi sylfa un-mild-heorta ·

Þas þyllice me tugon to þære sƿeartan helle ·290

Ða mid þam þe iulianus his drihten gebæd ·291
 he me eft arærde · þa unrotsodon helƿare
| ⁊ of godes trym-setle · ƿearð þus geclypod ·

Beo se man ongean gelæd · for minum leofan iuliane ·294
nelle ic hine ge-unrotian on ænigū þincge ·

Þa coman tƿegen englas · ⁊ me of ðam deoflum genamon ·296
⁊ me gebrohtan to life ·  ic nu on god gelyfe ·
æft̅ minum deaðe · þone þe ic ær ƿiðsóc ·

Þa ƿearð martianus mycclū gedrefed ·299
⁊ het hi ealle gebringan binnan þam cƿearterne eft ·
⁊ het gearcian ða tunnan to heora bærnette ·
sƿa sƿa se kasere hét · þurh his ærend-geƿrit ·

Þa ƿearð se edcucode man be-tƿux þysum gefvllod ·303
binnan þam cƿearterne · ⁊ gebád mid þam cristenū ·
oð  martianus hí to þam martyrdome gefette ·

Hi ƿurdon þa gebrohte gebundene on racen-teagū306
ealle to þam tunnum ⁊ to þære ontendnysse ·

Þa cƿæð martianus mid mycelre angsumnysse308
to þam halgū ƿerū · ⁊ to his agenū suna ·

Eala hƿilc anƿilnys ⁊ ge-ortruƿad ƿylla ·310
þurh ða þeos fægre geogað · nu forƿurðan sceall ·

Eala þu iuliane · þe aƿendest minne sunu ·312
sƿa  hé mín ne ræcð ne eac þære meder ·

Þa com seo modor mid mycelre sarnysse ·314
⁊ ealle hyre hyred-men to þære heofunga ·
⁊ manega oðre menn to þære mycclan ƿæfer-syne

Þa cƿæð þæs deman sunu · to his dreorigan fæder ·317

Ne þurfe ge us bemǽnan · ne urne siþ beƿepan ·318
beƿepaþ eoƿ sylfe · ƿe siðiaþ to heofonū ·
ƿe farað ðurh  fyr unforhte þurh god ·
⁊ ƿe ansunde becumað · eft to eoƿrū gesihþū ·

Þonne þu me eft gesihst gesundne of þam fyre ·322

Geþafa  min modor me gespræcan ·323
⁊ sume þreo niht on minū ræde beon ·
ic ƿene  þu ne forleosa naðor ne hí ne me ·

Þa ƿearð seo modor on mode geblissod ·326
⁊ se fæder cƿæð · |  he þæs cnapan ƿillan
ƿolde gefremman · gif he of þam fyre come ·

Þa hét se dema his gingran þis dón ·329
⁊ eode mid his ƿife · aƿeg to his huse ·
for þan þe hé ne mihte geseon hu his sunu forburne ·

Þa hét se under-gerefa hí ealle ge-bringan332
into ðam tunnū · ⁊ ontendan hí mid acuman ·
⁊ mid ƿuda belecgan · sƿa  se líg astah
má þone ðryttig fæðma · on þæs folces gesihþe ·
oð  ád ƿæs for-burnen · ⁊ ealle þa tunnan ·

Ða stodan þa halgan · hale of þam fyre337
glitiniende sƿa sƿa gold · þus herigende god ·

Transiuim᷒ p̅ ignē et aquā · et eduxisti nos in refrigerium ·339

Ƿe ferdon þurh fyr ⁊ ƿæter · ⁊ þu us læddest on celincge ·340

Þis ge-axode se dema · ⁊ þyder efste mid his ƿife ·341
⁊ æfter langsumre spræce · let þa modor to þam suna ·
on synderlicre clysincge ·  heo þone sunu gebigde ·

Þa gebædon þa halgan · binnan þam cƿearterne ·344
for  hæðene ƿif ·  se hælend hire gemiltsode ·

Ða ƿearð þær eorð-styrung · ⁊ eall seo stoƿ byfode ·346
⁊ þær scean mycel leoht · ⁊ mære bræð þær stanc ·
sƿa   ƿíf ƿundrode · þæs ƿynsuman bræþes ·
⁊ cƿǽð  heo næfre ǽr naht sƿilces ne gestunce ·

Þa gelyfde heo sona on þone lifigendan god ·350
⁊ ƿearð gefullod æt þam fore-sædan preoste ·
⁊ fullice ge-cyrred · to ðam soðan geleafan ·

Þa ge-axode se dema þis þus gedon ·353
⁊ het hi ealle gelædan · to his laðan andƿeardnysse ·
⁊ cƿæð to his suna celse mid graman ·

Bæde þu forþi þinre modor spræce ·356
 þu hí gebigdest to þinum bigenge fram me ·

Se cnapa þancode gode · þe hí sƿa gebigde358
to his soðan geleafan ·  heo ne losode mid him ·

Þa hét martianus  man hi gelæhte ·360
ac hí | ƿurdon ablende þe  bebod begunnon ·

Æfter þisū hét se heard-heorta dema ·362
beheafdian þa cempan · þe on crist gelyfdan ·
⁊ þa seofon gebroðra · he hét ealle forbernan ·
⁊ heold gyt þa feoƿer mid þam fore-sædan ƿífe ·
ƿolde hi gelædan to his leofestan godum
þe him to lafe ƿæron · þa ða oðre losodon ·
þæt hi huru þam godum heora lác geoffrodon ·

He het þa gedæftan ·  deofles templ ·369
⁊ þa halgan coman þider on bendum ·
⁊ ealle þa hæðen-gildan · þe þæs huses gimdon ·
coman to þam temple · togeanes þam cristenū ·

Þa bed Iulian᷒ gebigedū cneoƿum ·373
mid his ge-ferū · þone heofonlican god ·

 he his mihte gesƿutelode · mannū to geleafan ·375
⁊  templ to-ƿurpe · mid his aƿyrigedū godū ·

Æfter þære bene to-bærst seo eorðe ·377
⁊  templ asanc · mid eallum his sacerdū ·
⁊ fela þære hæðenra forferdon samod ·

Þa cƿæð Iulianus · to þam cƿellere þus ·380

Hƿær is nu seo fægernys · þines gefrætoƿodan temples ·381
hƿær synd þa anlicnyssa · þe þu onƿuldrodest ·

Sƿa sƿa hí besuncon on ðone sƿeartan grund ·383
sƿa sceole ge hæðene on helle grund besincan ·
þær bið æfre éce fýr · ⁊ undeadlic ƿyrm ·
þe eoƿre lichaman cyƿð · ⁊ ge þeah ne sƿeltað ·
ac bið æfre se lichama ge-edniƿod to ðam ƿitū ·

Þær ge biddað mildsunga · ac eoƿ biþ forƿyrned ·388

Git þa martian᷒ for his manful-nysse ·389
nolde on god gelyfan · ac ƿearð mid graman afylled ·
⁊ cƿæð  hé ƿolde ƿrecan his godas ·

Het þa beƿindan heora handa · ⁊ fét ·392
mid gesmyredū flexe · ⁊ fýr under-betan ·

Þa barn  fyr · ⁊ þa bendas samod ·394
⁊ þære halgena lichaman · belifon · unge-derode ·

Þa ƿolde se man-fulla hi mislice getintregian ·396
ac god hi ahredde · fram þam reðum ƿitū ·
| ⁊ sume eac ablende · of þam bysmor-fullū þenum ·

Þa geseah se arleasa aidlian his smeagunge ·399
⁊ ƿolde þagyt cunnian anes cynnes ƿite ·
þurh reþe deor · þa þa his reðnyss ne mihte ·
þurh manna dæda · gedón sƿa he ƿolde ·

He hét þa gelædan leon · ⁊ beran403
manega ⁊ mycele · to þam halgum martyrū ·
ac þa reðan deor · ne dorston hi reppan ·
ác bigdon heora heafda to ðære halgena fotum ·
⁊ heora liða liccodon · mid liðra tungan ·

Þa hét martianus his manfullan cƿelleras ·408
þa halgan beheafdian · ⁊ hí þæs fægnodon ·
þanciende gode · ealra his godnyssa ·

Iulianus þá ⁊ se geonga cniht411
martianes sunu · ⁊ his modor samod.
antonius se preost · ⁊ se ge-edcucode man ·
ƿurdon to-somne · of-slagene for criste ·
⁊ ferdon mid ƿuldre · to þam ƿelƿillendan hælende
⁊ to heora geferum þe him fore-stopon ·
 is basilissa · mid hyre beorhtū mædenū ·
⁊ se halga heap · þe on ðam huse for-barn ·
⁊ þa tƿentig ƿeard-menn · þe se ƿælhreoƿa be-heafdode ·
⁊ þa seofan gebroðra · þe he for-bernan hét ·
⁊ hi ealle nu mid gode on ecnysse blyssiað ·

Hit gelamp þa sona · sƿa hí ofslagene ƿæron ·422
 mycel líget cóm · ofer þa manfullan hæðenan ·
⁊ sƿiðlic eorð-styrung · ⁊ egeslic þunor ·
sƿa  þæra manfulra mycel dæl · for-ƿearð ·
⁊ nan stoƿ ne æt-stód · mid þam stænenū godum ·
ne nan hæðen-gyld se hagol ne belæfde ·

Þa fleah martian᷒ for nean adyd ·428
⁊ he ƿearð fornumen · æfter feaƿum dagum ·
sƿa  ƿurmas crupon cuce of his lice ·
⁊ se arleasa ge-ƿát mid ƿite to helle ·

Þæra halgan líc · þurh geleaf-fulle menn ·432
ƿurdon gebyrigde sona mid blisse · binnan godes cyrcan ·

Sy him á ƿuldor on ecere ƿorulde · ƿe cƿeþað. Amen.434