Ælfric's Lives of Saints/20aed

Ælfric's Lives of Saints by Ælfric, translated by Gunning / Wilkinson
Of Saint Æðeldryða


uiiii. kl̅ iul̅. nat̄l̄ sce̅ æðeldryðe uirginis.

Ƿe ƿylla nv aƿritan þeah ðe hit ƿundorlic sy 001
be ðære halgan sce̅ æðeldryðe þam engliscan mædene ·
þe ƿæs mid tƿam ƿerum ⁊ sƿa-ðeah ƿunode mæden ·
sƿa sƿa þa ƿundra gesƿuteliað þe heo ƿyrcð gelome ·

Anna hatta (sic) hyre fæder east engla cynincg · 005
sƿyðe cristen man sƿa sƿa he cydde mid ƿeorcum ·
⁊ eall his team ƿearð geƿurðod þurh god ·

Æðeldryð ƿearð þa for-gifen anum ealdor-menn to ƿife. 008
ac hit nolde se ælmihtiga god  hire mægð-had ƿurde
mid hæmede adylegod · ac heold hi on clænnysse
forðan þe he is ælmihtig god ⁊ mæg don eall  he ƿile ·
⁊ on manegum ƿisum his mihte gesƿutelað ·

Se ealdor-man geƿat þa ða hit ƿolde god · 013
⁊ heo ƿearð forgifen ecfride cynincge ·
⁊ tƿelf gear ƿunode unge-ƿemmed mæden
on þæs cynincges synscype · sƿa sƿa sƿutele ƿundra
hyre mærða cyðaþ · ⁊ hire mægð-had gelome ·

Heo lufode þone hælend þe hi heold unƿemme · 018
⁊ godes ðeoƿas ƿurðode · an þæra ƿæs ƿilfrid bisceop
þe heo sƿyðost lufode · ⁊ he sæde bedan
 se cyning ecfrid him oft behete mycel
on lande ⁊ on feo · gif he læran mihte
æðeldryðe his gebeddan ·  heo bruce his synscipes ·

Nu cƿæð se halga beda þe þas boc gesette · 024
 se ælmihtiga god mihte eaðe gedón
nu on urum dagum  æðeldryð þurh-ƿunode
unge-ƿemmed mæden · þeah ðe heo ƿer hæfde ·
sƿa sƿa on ealdum dagum hƿilon ær getimode
þurh þone ylcan god þe æfre þurh-ƿuna
mid his gecorenum halgum · sƿá sƿá hé sylf behét ·

Æðeldryð ƿolde ða ealle ƿoruld-þincg forlætan · 031
⁊ bæd georne þone cynincg  heo criste moste þeoƿian ·
on mynsterlicre drohtnunge sƿa hire mod hire to-speon ·

Þa lyfde hire se cynincg þeah þe hit embe lang ƿære 034
þæs þe heo geƿilnode · ⁊ ƿilfrid bisceop þa
hi gehadode to mynecene · ⁊ heo syððan on mynstre ƿunode
sume tƿelf monað sƿa · ⁊ heo syððan ƿearð gehadod
eft to abudissan on elig mynstre ·
ofer manega mynecena · ⁊ heo hi modorlice heold
mid godū gebysnungum to þam gastlican life ·

Be hire is aƿrytan (sic)  heo ƿel drohtnode 041
to anum mæle fæstende · butan hit freols-dæg ƿære ·
⁊ heo syndrige gebedu sƿyðe lufode
⁊ ƿyllen ƿeorode · ⁊ ƿolde seld-hƿænne
hire lic baðian butan to heahtidum ·
⁊ ðonne heo ƿolde ærest ealle ða baðian
þe on ðam mynstre ƿæron · ⁊ ƿolde him ðenian
mid hire þinenum · ⁊ þonne hi sylfe baðian ·

Þa on þam eahteoðan geare siððan heo abbudisse ƿæs · 049
heo ƿearð geuntrumod sƿa sƿa heo ær ƿitegode ·
sƿa  an gesƿel ƿeox on hire sƿuran
mycel under þam cynn-bane · ⁊ heo sƿiðe þancode gode
 heo on þam sƿuran sum gesƿinc þolode ·

Heo cƿæð ic ƿat geare  ic ƿel ƿyrðe eom · 054
 min sƿura beo gesƿenct mid sƿylcere untrum-nysse ·
forðan þe ic on iugoðe frætƿode minne sƿuran
mid mænig-fealdum sƿur-beagum · ⁊ me is nu geþuht
 godes arfæstnyss þone gylt aclænsige ·
þonne me nu þis gesƿel scynð for golde ·
⁊ þæs hata bryne for healicum gymstanum ·

Þa ƿæs þær sum læce on ðam geleaffullum heape · 061
cynefryð gehaten ⁊ hi cƿædon þa sume
 se læce sceolde asceotan  gesƿell ·
þa dyde he sona sƿa · ⁊ þær sah ut ƿyrms ·

Ƿearð him þa geðuht sƿilce heo geƿurpan mihte 065
ac heo geƿat of ƿorulde mid ƿuldre to gode ·
on þam ðriddan dæge syððan se dolh ƿæs geopenod ·
⁊ ƿearð bebyrged sƿa sƿa heo bæd sylf ⁊ hét ·
betƿux hire gesƿustrum · on treoƿenre cyste ·

Þa ƿearð hire sƿustor sexburh gehadod 070
to abbudissan æfter hire geendunge ·
seo ðe ær ƿæs cƿén on cantƿare-byrig ·

Þa ƿolde seo sexburh æfter syxtyne gearum · 073
don hire sƿustor ban of ðære byrgene up ·
⁊ beran into þære cyrcan · ⁊ sende þa gebroðra
to secenne sumne stan to sƿilcere neode ·
forðan þe on þam fenlande synd feaƿa ƿeorc-stana ·

Hi hreoƿan þa to grantan-ceastre · ⁊ god hi sona gehradode · 078
sƿa  hi þær gemetton ane mære þruh
ƿið þone ƿeall standende · geƿorht of marm-stane
eall hƿites bleos bufan þære eorðan ·
⁊  hlyd ðær-to gelimplice gefeged ·
eac of hƿitum marm-stane sƿa sƿa hit macode god ·

Þa naman ða gebroðra blyðelice þa ðruh · 084
⁊ gebrohton to mynstre · mycclum ðancigende gode ·
⁊ sexburh seo abbudisse het slean an geteld
bufan ða byrgene · ƿolde þa bán gaderian ·

Hi sungon ða ealle sealmas · ⁊ lic-sang · 088
þa hƿile þe man ða byrgene bufan geopenode ·
þa læg heo on ðære cyste · sƿilce heo læge on slæpe
hal eallum limum · ⁊ se læce ƿæs ðær
ðe  ge-sƿell geopenode · ⁊ hi sceaƿode georne ·

Þa ƿæs seo ƿund gehæled · þe se læce ƿorhte ǽr · 093
eac sƿilce þa ge-ƿæda · þe heo beƿunden ƿæs mid ·
ƿæron sƿa ansunde · sƿylce hi eall niƿe ƿæron ·

Sexburh þa hyre sƿuster sƿiðe þæs fægnode · 096
⁊ hi þƿogon ða syððan þon̅ saƿl-leasan lichaman ·
⁊ mid niƿum geƿædum beƿundon arƿurðlice ·
⁊ bæron Into ðære cyrcan · blyssigende mid sangum ·
⁊ ledon hí on ðære þryh · þær ðær heo lið oð þis ·
on mycelre arƿurðnysse · mannum to ƿundrunge ·

Ƿæs eac ƿundorlic ·  seo ðruh ƿæs geƿorht 102
þurh godes foresceaƿunge hire sƿa gemæte ·
sƿylce heo hyre sylfre sƿa ge-sceapen ƿære ·
⁊ æt hire hæfde ƿæs aheaƿen se stán ·
gemæte þam heafde þæs halgan mædenes ·

Hit is sƿutol  heo ƿæs ungeƿemmed mæden · 107
þonne hire lichama ne mihte formolsnian on eorðan ·
⁊ godes miht is gesƿutelod soðlice þurh hi ·
 he mæg aræran ða for-molsnodon (sic) lichaman ·
seðe hire lic heold hál on ðære byrgene
git oð þisne dæg · Sy him ðæs á ƿuldor ·

Þær ƿæron ge-hælde þurh ða halgan femnan 113
fela adlige menn · sƿa sƿa ƿe gefyrn gehyrdon ·
⁊ eac ða þe hrepodon þæs reafes ænigne dæl ·
þe heo mid beƿunden ƿæs · ƿurdon sona hale ·
⁊ manegum eac fremode seo cyst micclū ·
þe heo ærest on læg · sƿa sƿa se lareoƿ beda
on ðære bec sæde · þe he ge-sette be ðysum ·

Oft ƿoruld-menn eac heoldon sƿa sƿa us bec secgað 120
heora clænnysse on synscipe for cristes lufe
sƿa sƿa ƿe mihton reccan gif ge rohton hit to gehyrenne ·

Ƿe secgað sƿa-ðeah be sumum ðegne · 123
se ƿæs þryttig geara mid his ƿife on clænnysse ·
þry suna he gestrynde · ⁊ hi siððan buta
ðrittig geara ƿæron ƿunigende butan hæmede ·
⁊ fela ælmyssan ƿorhton · oð  se ƿer ferde
to munuclicere drohtnunge · ⁊ drihtnes englas
comon eft on his forð-siðe · ⁊ feredon his saƿle
mid sange to heofonum · sƿa sƿa us secgað bec ·

Manega bysna synd on bocum be sƿylcum · 131
hu oft ƿeras ⁊ ƿíf ƿundorlice drohtnodon ·
⁊ on clænnysse ƿunodon · to ƿuldre þam hælende ·
þe þa clænnysse astealde · crist ure hælend ·
þam is á ƿurðmynt · ⁊ ƿuldor on ecnysse · amen ·