Blue e'ed Mary/Blue e'ed Mary

Blue e'ed Mary.

My early love I canna rue,
⁠My bonnie blue e’ed Mary, O!
I ne’er will break the bosom vow,
⁠Is plighted to my dearie, O!
A fairer form I canna see,
A fairer face there canna he,
Nane bears a heart sae leal as thee,
⁠My bonnie blue e’ed Mary, O!

The form’s the pine in brushwood bower,
⁠My bonnie blue e’ed Mary, O!
Thy mein the modest daisy flower,
⁠Amang the braes sae briery, O!
Thy hair, the glossy fallin’ stream,
Thy brow, the milky river feam,
Thy cheek, the rosy morning beam,
⁠My bonnie blue e’ed Mary, O!

I ne’er made love to ane but thee,
⁠My bonnie blue e’ed Mary, O!
Thou ne’er own’d love to ane but me,
⁠My ain, my only dearie, O!
My morn o’-love—the morn o’ thine,
And a’ our happy days sinsyne,
The roll o’ memory canna tine,
⁠My bonnie blue e’ed Mary, O!

While morning lifts his gowden eye,
⁠An’ glints o’er a’ sae cheery, O!
While e’enin’ vails the face o’ day,
⁠And starnies gild the carry, O!
My early love—my bosom vow,
My plighted faith, I’ll never rue,
But live in love and bliss wi’ you,
⁠My bonnie blue e’ed Mary, O.