Blue e'ed Mary/Tam Glen

For other versions of this work, see Tam Glen.

TAM GLEN.

My heart is a breaking, dear Tittie,
⁠Some counsel unto me come lend,
To anger them a’ is a pity;
⁠But what will I do wi’ Tam Glen?

I’m thinking wi’ sic a braw fallow,
⁠In poortith I might make a fen’;
What care I in riches to wallow,
⁠If I maunna marry Tam Glen?

There’s Lowric the laird of Drumeller,
⁠“Guid day to you,” bride, he comes ben:
He brags and he blaws o’ his siller,
⁠But whan will he dance like Tam Glen?

My minny does constantly cleave me,
⁠And bids me beware o’ young men;
They flatter, she says, to deceive me:
⁠But wha can think sae o’ Tam Glen

My daddie says, gin I’ll forsake him,
⁠He’ll gie me guid hunder merks ten:
But, if it’s ordain’d I maun tak him,
⁠O wha will I get but Tam Glen?

Yestreen at the Valentine’s dealing,
⁠My heart to my mou' gied a sten’;
For thrice I drew ane without failing,
⁠And thrice it was written, Tam Glen.

The last Halloween I was waukin
⁠My drouket sark-sleeve, as ye ken;
His likeness came up the house stauking,
⁠And the very grey breeks o’ Tam Glen!

Come counsel, dear Titty, don’t tarry:
⁠I’ll gie you my bonnie black hen,
Gif ye will advise me to marry
⁠The lad I lo’e dearly, Tam Glen.