and cutt heꝛ meete in to ſmale moꝛcellis. foꝛ thay ſhulde nott tyre on bonys tyll they myght flie. Then afteꝛ when ſhe begynnyth to penne. and plumyth. and ſpalchith. and pikith heꝛ ſelfe. Putt hiꝛ in a clooſe waꝛme place. that no fulmeꝛtis noꝛ fecheus. ne otheꝛ vermyn com nott in to hiꝛ. and let the place be ſecure from wynde and rayne. and then ſhe will preue hiꝛ ſelfe and eueꝛ more yeue hiꝛ good hote meetys. Foꝛ it is betteꝛ to a man to fede his hawke while ſhe is tendre with hoote meetis. to make hir good with ſomme coſt. then to fede hiꝛ with euell meetis to make hiꝛ vnthrefti with lytyll coſt. ¶And looke whan ſhe begynnyth to feꝛme then yeue hiꝛ bathyng.
A medecyne foꝛ woꝛmys in an hawke wiche ſekeneſſe is called the Fylaundris.
Meꝛke wele this ſekeneſe and beware theꝛof. This is the medecyne theꝛfore. ye ſhall take an heꝛbe that is called Neppe and putt it in a ſmall gut of a Capon oꝛ of an henne. and knyt it with a threde. and let hiꝛ Reſaue it hoott. and ſhe ſhall be hoott and ſaafe ¶Thus ye ſhall knawe whan yowre hawke hath woꝛmys in hiꝛ bowke. Looke whan ſhe hath caſtyng. and ye ſhall fynde oon oꝛ .ij. a bowte hiꝛ caſtyng place iff ſhe haue ony.
¶A medecyne fooꝛ an hawke that caſtys woꝛmys at the foundemēt what woꝛmis that thei be
Take the lymayll of Iren. ⁊ medyll it wt fleſh of pooꝛke ⁊
