Page:Gospel of Saint John in West-Saxon.djvu/83

26. And nu hē spycþ openlīce, and hig ne cweðaþ nān ðing tō him. Cweðe wē hwæþer þā ealdras ongyton þæt þis is Crīst?^[1]

27. Ac wē witon hwanon þēs is; ðonne Crīst cymþ, þonne nāt nān mann hwanon hē biþ.^[2]

28. Sē Hǣlend clypode and lærde on þām temple and cwæð, Mē gē cunnon, and gē witon hwanon ic eom; and ic ne cōm fram mē sylfum, ac sē is sōð þe mē sende, þone gē ne cunnon.^[3]

29. Ic hyne can; and gif ic secge þæt ic hine ne cunne, ic bēo lēas, and ēow gelīc. Ic hyne can, and ic eom of him, and hē mē sende.

30. Hig hine sōhton tō nimanne; and hyra nān hys ne æthrān, for ðām þe his tīd ne cōm þā gyt.^[4]

31. Manega of ðǣre menigeo gelȳfdon on hine, and cwǣdon, Cweþe gē wyrcð Crīst mā tācna þonne he cymð þonne þēs dēð?^[5]

32. Þā Pharisei gehȳrdon þā menigeo þus murcnigende be him.

Ðys [godspel] sceal on mōnandæg on bþære fyftan wucan innan lenctene.

Đā ealdras and ðā Pharisei sendon hyra þēnas þæt hig woldon hine gefōn.^[6]

1. A, ongytan.
2. A, man hwanen.
3. A, wyton hwanen.
4. A, nymanne; A, heora; C, is tid (for his tid).
5. A, mænego; A, cweðað ge.
6. A, mænego; Corp., murcnigede, B, murcnigende, C, murnige; B, C, and pharisei (om. ða); A, heora.