Page:Gospel of Saint John in West-Saxon.djvu/84

33. Đā cwæð sē Hǣlend, Gȳt ic bēo sume hwīle mid ēow, and ic gā tō ðām þe mē sende.^[1]

34. Gē sēcað mē, and ne findaþ; and gē ne magon cuman þār ic eom.^[2]

35. Þā Iudeas cwǣdon betwēonan him sylfum, Hwyder wyle þēs faran þæt wē hine ne findon? cwyst ðū wyle hē faran on ðēoda tōdrǣfednysse, and hig lǣran?^[3]

36. Hwæt is ðēos spræc þe hē sprycð, Gē sēceaþ mē, and ne findaþ; and gē ne magon cuman þār ic eom?^[4]

37. On þām æftemestan mǣran frēolsdæge stōd sē Hǣlend and clypode, Cume tō mē sē ðe hine þyrste, and drince.^[5]

38. Se þe gelyfþ on mē, swā þæt gewrit cwyð, lybbendes wætres flōd flowað of his innoðe.^[6]

39. Þæt he cwæð be þām Gāste þe þā sceoldon underfōn þe on hyne gelyfdon; þā gyt næs sē Gāst geseald, for þām pe sē Hǣlend næs ðā gȳt gewuldrud.^[7]

Ðys godspel sceal on þūresdæg on þǣre fiftan wucan innan lenctene.

40. Of ðǣre tide sēo menigeo cwæð, þā hēo gehȳrde ðās his sprǣce, Đēs is sōð wītega.^[8]

1. A, om. mid eow; A, gange (for ga).
2. B, C, seceað.
3. A, betwioh; A, todræfednessa.
4. A, spræc (for sprycð); A, secað; B, C, secegað.
5. A, æftemystan; A, Cume ge to me þe hym þyrste.
6. C, libbendes; A, wæteres; A, ynnoðe.
7. A, B, C, gewuldrod.
8. A, mænio; A, spræca.