Page:The fables of Aesop, as first printed by William Caxton in 1484, with those of Avian, Alfonso and Poggio. Vol 2.djvu/104

 

gyder / but the wulues kyld the dogges / whiche were capytayns and protectours of the ſheep / And the dogges dyde but lytyll hurte to the wulues / wherfore whanne the lytyl and yong wulues were growen in theyr age / they came of eche part and countrey / and aſſembled them to gyder / and all of one accord and wylle ſayd to theyr aunceſtres and faders / we muſt ete vp alle the ſheep / And theyr faders anſuerd thus to them / we haue made pees with them / Neuertheles the yonge wolues brake the pees and ranne fyerſly vpon the ſheep / and theyr faders wente after them /   ¶ And thus by cauſe that the ſheep had delyuerd the dogges to the wolues / the whiche were theyr capitayns / and that they had none that kepte them / they were all eten and deuoured of the wulues / Therfore hit is good to kepe well his capytayne / whiche may at a nede gyue ſocor and helpe / For a trewe frend is oftyme better at a nede than a Royalme / For yf the ſheep had kepte the loue of the dogges / the wolues had neuer deuoured them / wherfore it is a ſure thynge to kepe wel the loue of his protectour and good frende /