Page:The fables of Aesop, as first printed by William Caxton in 1484, with those of Avian, Alfonso and Poggio. Vol 2.djvu/169

 

wel greue you for the grete ſekeneſſe that ye haue / but dere ſyre / yf hit pleaſe to the or euer I come nerer to your Royal mageſte I ſhalle goo bathe me and make me fayre and clene / And thenne I ſhall come ageyne to preſente my ſelf byfore thy noble perſone / And notwithſtondynge al this / alſo er I goo / pleaſe the to wete & knowe that I come from alle the contrees here aboute / and from alle the Royalmes adiacent to this prouynce / for to ſee yf I coude fynde ſomme good medycyn dusynge and nedeful to thy ſikeneſſe / and for to recouere thy helthe / but certaynly I haue foūd no better coūceylle than the coūceylle of an aūcycent greke with a grete & long berd / a man of grete wyſdom / ſage & worthy to be prayſed / the whiche ſayd to me / how in this prouynce is a wulf withoute taylle / the whiche hath loſt his taylle by the vertue of the grete medycyn whiche is within hym / For the whiche thynge it is nedeful and expedyent / that ye doo make this wulf to come to yow for the recoueraunce of the helthe of your fayr and noble body / And whan he is come dyssymylle and calle hym to counceylle / ſayenge that it ſhalle be for his grete worſhip & proffite / & as he ſhal be nyghe vnto yow caſt on hym your armed feet / and as ſwetely as ye maye pulle the ſkynne fro the body of hym & kepe it hoole /