Page:The fables of Aesop, as first printed by William Caxton in 1484, with those of Avian, Alfonso and Poggio. Vol 2.djvu/174

 

thy foote / ¶ And as the mare ſhewed his foote to the wulf / ſhe gaf to the wulf ſuche a ſtroke bytwexe bothe his eyen / that alle his hede was aſtonyed and felle doune to the ground / and a longe ſpace was the wulf lyenge vpon the erthe / as deed / And whanne he was come to hym ſelf ageyne / and that he coud ſpeke / he ſayd / I care not for this myiſhap / For wel I wote that yet this day I ſhalle ete / and be fylled of delycious mete / And inſayenge theſe wordes lyft hym ſelf vp / and wente aweye / ¶ And whanne he had walked and gone a whyle / he fond two rammes within a medowe whiche with theyr homes lauched eche other / And the wulf ſayd to hymſelf / Bleſſed be god / that now I ſhal be wel fedde / he thenne came nyghe the two rammes / & ſaid / Certaynly I ſhall ete the one of you two   And one of them ſayd to hym / My lord doo alle that it pleſe yow / but fyrſt ye muſt gyue vs the ſentence of a proceſſe of a plee whiche is bytwixe vs bothe / And the wulf anſuerd / that with ryght a good wylle he wold doo hit / And after ſayd to them / My lordes telle my your reſons and caas / to thende that the better I may gyue the ſentence of your dyferent and question / And thenne one of them beganne to ſay / My lord / this medowe was bylongynge to our fader / And by cauſe that he deyde with-