Page:The fables of Aesop, as first printed by William Caxton in 1484, with those of Avian, Alfonso and Poggio. Vol 2.djvu/175

 

oute makynge ony ordenaunce or teſtament / we be now in debate and ſtryf for the partynge of hit / wherfore we praye the that thow vouchesauf to accorde oure dyferent / ſo that pees be made bytwene vs / And thenne the wulf demaunded of the rammes how theyr queſtion myght be accorded / Ryght wel ſayd one of them / by one manere / whiche I ſhal telle to the / yf hit pleaſe to the to here me / we two ſhalle be at the two endes of the medowe / and thow ſhalt be in the myddes of it / And fro thende of the medowe / we bothe at ones ſhalle renne toward the / And he that fyrſt ſhalle come to the / ſhalle be lord of the medowe / And the laſt ſhalle be thyn / Wel thene ſayd the wulf / thyn aduys is good and wel purpoſed / late ſee now who fyrſt ſhalle come to me / Thenne wente the two rammes to renne toward the wulf / And with alle theyr myght came and gaf to hym ſuche two ſtrokes bothe at ones ageynſt bothe his ſydes / that almoſt they brake his herte within his bely / & then fyll doune the poure wulf alle aswowned / And the rammes wente theyr way / ¶ And whanne he was come ageyn to hym ſelf / he took courage and departed / ſayenge to hym ſelf / I care not for alle this Iniurye and ſhame / For as myn ers dyde ſynge to me/ yet ſhalle I this day ete ſomme good and delycious mete /