¶ The ix fable maketh mencion of the two pottes
He poure ought not to take the
Ryche as his felawe as it appiereth
by this fable of two pottes /
of the whiche the one was coper /
and the other of erthe / the whiche
pottes dyd mete to gyder within a Ryuer / ¶ &
by cauſe that the erthen pot wente ſwyfter than
dyd the coper potte / the pot of coper ſayd to
the pot of erthe / I praye the that we may goo
to gyder / And the erthen potte anſuerd and
ſayd to the coper pot / I wylle not go with the /
For it ſhold happe to me as it happed to the
glas and of the morter For yf thow ſholdeſt
mete with me / thow ſholdeſt breke and putte
me in to pyeces / ¶ And therfore the poure is
a fole that compareth and lykeneth hym ſelf to
the ryche and myghty / For better is to lyue in
pouerte than to deye vylaynouſly and oppreſſyd of
the ryche
