¶ The xi fable is of the Ape and of his ſone
o fowler a thyng is to the man / than
with his mouth to preyſe hym ſelf /
As this fable reherceth to vs / Of
Jupiter kynge of alle the world
whiche made alle the beeſtes and
alle the byrdes to be aſſembled to gyder for
to knowe theyr bounte / and alſo theyr kynd /
Emonge alle the whiche came the Ape / whiche
preſented his ſone to Jupiter / ſayenge thus /
Fayre ſyre and myghty god / loke and ſee here
the faireſt beeſt that euer thow createſt in this
world / And Jupiter thenne beganne to lawhe /
and after ſayd to hym / thow arte wel a fowle
beeſt to preyſe ſoo thy ſelf / For none oughte
to preyſe hym ſelf / but oughte to doo good
and vertuous werkes / wherof other may preyſe
hym / for it is a ſhameful thyng to preyſe hym
ſelf