¶ The xvj fable is of the fyſſher / and of the lytyl fyſſhe
En ought not to leue that thynge
whiche is ſure & certayne / for
hope to haue the vncertayn / as
to vs reherceth this fable of a
fyſſhier whiche with his lyne toke
a lytyll fyſſhe whiche ſayd to hym / My frend I
pray the / doo to me none euylle / ne putte
me not to dethe / For now I am nought / for
to be eten / but whanne I ſhalle be grete / yf
thow come ageyne hyther / of me ſhalt thow
mowe haue grete auaylle / For thenne I ſhalle
goo with the good whyle / And the Fyſſher
ſayd to the fyſſhe . Syn I hold the now / thou
ſhalt not ſcape fro me / For grete foly hit were
to me for to ſeke the here another tyme / For
men ought not to lete goo that / of what they
be ſure of / hopynge to haue afterwards that
that they haue not and whiche is vncertayne.
