ſhall he his / And by cauſe that we bothe ben ſubtyle and wyſe / he ſhalle not mowe dreme as wel as we ſhalle / wherof the loof be ours / wherof alle they thre were wel content / and al byganne to ſlepe /
¶ But whanne the labourer or vylayne knewe and perceyued all theyre fallace / and ſawe that his two felawes were a ſleep / he wente and drewe the loof oute of the ouen and ete hit / ¶ And after he feyned to be a ſlepe / and thene one of the burgeys roſe vp / and ſayd to hys felawes / I haue dremed a wonder dreme / For two Angels haue taken & borne me with grete Joye before the dyuyn mageſte / And the other burgeys his felawe awoke and ſayd / Thy dreme is merueyllous and wonderfull / but I ſuppoſe that the myn is fayrer / than thyn is / For I haue dremed that two Angels drewe me on hard ground for to lede me in to helle / And after they dyd awake the vylayne whiche as dredeful ſayd / who is there / and they anſuerd / we be thy felawes / And he ſayd to them / how be ye ſoo ſoone retourned / And they anſwerd to hym / how retorned / we departed not yet fro hens / And he ſayd to them by my feythe / I haue dremed that the Angels had led one of yow in to paradys or heuen / and the other in to helle / wherfor I ſuppoſed / that ye ſhold neuer have comen
