Page:The fables of Aesop, as first printed by William Caxton in 1484, with those of Avian, Alfonso and Poggio. Vol 2.djvu/29

This page has been proofread, but needs to be validated.
PRIMUS.
13


¶ The viij fable is of the wulf and of the crane

WHo fo euer doth ony good to the euyll man he ſynneth as Eſope ſaith / for of ony good which is don to the euils cometh no prouffit / wherof Eſope reherceth to vs ſuche a fable / A wulf ete & deuoured a ſheep of whos bones he had one in his throte which he coulde not haue out & ſore it greued hym / thenne went the wulf & praid the crane that ſhe wold draw oute of his throte the bone / & the crane put her nek in to his throte & drewe out the bone wherby the wulf was hole /¶ And the crane demaunded of hym to be payd of her ſalary¶ And the wulf anſwerd to her / Thou arte well vnconnyng & no good connyng / remembryng the good that I haue done to the / for whan thou haddeſt thy neck within my throte / yf I had wold / I might haue ete the / and thus it appiereth by the fable how no proufitte cometh of ony good whiche is done to the euyle