¶ The second fable is of the woman and of the ypocryte
He generacion or byrth of the ypocryte is moche dampnable and euylle / As it appiereth by this fable / and as poge reherceth to vs whiche ſayth / that ſomtyme he fond hym ſelf in a good felauſhip / where he herd a fable / whiche was there reherced / Of the whiche the tenour foloweth / and ſeyth the ſayd poge / that of alle the goodes of this world / the ypocrytes ben poſſeſſours / For how be hit / that an ypocryte haue ſomtyme wylle for to helpe ſomme poure and Indygent / Neuertheles he hath a condycyon within hym ſelf / that is to wete / that he ſhold rather ſee a man at the poynt of dethe than for to ſaue his lyf of an halfpeny / And this preſumpcion is called ypocryſye / as ye ſhal here herafter by the fable folowyng the whiche ſayth that one beynge in the felauſhip of Poge reherced / that ſomtyme the cuſtomme of alle the poure was that they wente before the folkes dores withoute ſayenge ony word It happed thenne on that tyme that a poure man