¶ The fourth fable is of the huntynge and hawkynge
Oge Florentyn reherceth to vs / how
ones he was in a felauſhip where
men ſpak of the ſuperflue cure of
them whiche gouerne the dogges
and hawkes / wherof a mylannoys
named Paulus beganne to lawhe / and lawhyng
requyred of Poge that he wold reherce ſomme
fable of the ſayd hawkes / And for loue of alle
the felauſhip he ſayd in thys manere / Somtyme
was a medecyn whiche was a Mylannoys This
medecyn heled al foles of al maner of foly / and
how & in what manere he dyd hele them / I
ſhall telle hit to you This medycyn or leche had
within his hows a grete gardyn And in the
myddes of hit was a depe and a brode pytte /
whiche was ful of ſtynkynge and Infected water /
And within the ſame pytte the ſayd medycyn
put the foles after the quantyte of theyr folyſſhnes
/ ſomme vnto the knes / and the other vnto
the bely / And there he bonde them faſt at a
poſt / but none he putte depper / than vnto the
ſtomack for double of gretter Inconuenient / It
