E telleth alſo that ther was a carryk
of Jene hyred in to fraūce for to
make warre ayenſt engliſſhmen /
of the whiche caarrick the patrone
bare in his ſheld painted an oxe
hede / whiche a noble man of fraūce beheld and
ſawe / & ſayd he wold auenge hym on hym that
bare tho armes / wherapon aroos an altercacion
ſo moche / that the frenſſhman prouoked the
Janueye to bataylle and fyght therfore / The
Januey acceptyd the prouocacion / & came at
the day aſſigned in to the felde withoute ony
araye or habyllements of warre / And that other
frenſſhe man came in moche noble apparayll in
to the feld that was ordeyned / & thene the
patrone of the carrik ſaid wherfore is it that
we two ſhold this day fyght & make bataill fore
I ſaye ſaid that other that thyn armes ben myn /
& bylonged to me to ſore that thow haddeſt
them / Thenne the Januey ſaid It is no nede to
make ony bataylle therfore / For the armes that
I bare is not the hede of an oxe but it is the hede
of a cowe whiche thynge ſo ſpoken the noble
Frenſſhe man was abaſſhed and ſo departed half
mocqued