¶ The xix fable is of the mylan whiche was ſeke and of his moder
E that euer doth euylle ought not
to ſuppoſe ne haue no truſt that
his prayer at his nede ſhalle be
herd / Of the whiche thynge Eſope
ſheweth to us ſuche a fable / Of
a mylan whiche was ſeke / ſo moche that he had
no truſte to recouer his helthe / And as he ſawe
hym ſo vexed with feblenes / he prayd his moder
that ſhe ſhold praye vnto the goddes for hym /
And his moder anſuerd to hym / My ſone thow
haſt ſo gretely offendyd and blaſphemyd the
goddes that now they wol auenge them on the /
For thow preyeſt not them by pyte ne by loue /
but for dolour and drede / For he whiche ledeth
euylle lyf / and that in his euylle delynge is obſtynate
/ ought not to haue hope to be delyuered
of his euyll / For whan one is fall into extremyte
of his ſekenes / thenne is the tyme come that he
muſt be payed of his Werkes and dedes / For he
that offendeth other in his proſperyte / whan he
falleth in to aduerſyte / he fyndeth no frendes /
