Page:The fables of Aesop, as first printed by William Caxton in 1484, with those of Avian, Alfonso and Poggio. Vol 2.djvu/96

 

of the ſayd woman he wente to her / and prayd her to gyue hym ſomme drynke / And ſhe with good herte gaf hym to drynke / And the knyght dranke with grete appetyte / as he that had grete thurſte / & whan he had dronke / he torned ageyne to the galhows ward / This knight came another tyme to the woman for to comforte her/ And thre tymes he dyd ſoo / And as he was thus goyng and comynge / doubtynge hym of nobody / his hanged man was taken and had fro the galhows / And whanne the knyght was come ageyne to the galhows & ſawe that he had loſte his dede man / he was gretely abaſſhed & not withoute cauſe  For hit was charged to hym vpon peyne to be hanged / yf he were take awey / This knyght thenne seynge his Judgement / tourned and went ageyne to the ſayd woman / & caſt hym at her feete / and laye before her as he had be dede / And ſhe demaūded of hym / My frend / what wylt thow that I doo for the / Allas ſayd he/ I praye the that thow ſocoure and counceylle me now at my grete nede / For by cauſe I haue not kept wel my theef / whiche men haue rauyſſhed fro me/ the kynge ſhalle make me to be put to dethe / And the woman ſayd / Haue no drede my frend / For well I ſhalle fynde the manere wherby thow ſhalt be delyuerd / For we ſhall take my huſbond / and ſhalle

hange