The Merry Muses of Caledonia/Jockey was a Bonny Lad


Tune"John Roy Stewart's Strathspey."

An old song which appears in the Appendix to Herd's collection.

My Jockey is a bonny lad,
A dainty lad, a merry lad,
A neat, sweet, pretty little lad,
An' just the lad for me.
For when we o'er the meadows stray,
He's ay sae lively, ay sae gae,
An' aft right canty does he say,
There's nane he lo'es like me.

An' he's ay huggin', ay dawtin',
Ay clappin', ay pressin',
Ay squeezin', ay kissin',
An' winna let me be.

I met my lad the ither day,
Friskin' thro' a field o' hay;
Says he, dear Jenny, will ye stay,
An' crack a while wi' me.
No, Jockey lad, I darena stay,
My mither she'd miss me away;
Syne she'll flyte an' scauld a' day,
An' play the deil wi' me.
But Jockey still continued
Ay huggin', &c.

Hoot! Jockey, see my hair is down,
An' look ye've torn a' my gown,
An' how will I gae thro' the town,
Dear laddie tell to me.
He never minded what I said,
But wi' my neck an' bosom play'd;
Tho' I entreated, begg'd, an' pray'd
Him no to touzle me.

But Jockey still continued
Huggin', dawtin', clappin', squeezin',
An' aye kissin', kissin', kissin'.
Till down cam we.

As breathless an' fatigued I lay,
In his arms among the hay,
My blood fast thro' my veins did play
As he lay huggin' me;
I thought my breath would never last,
For Jockey danc'd sae devilish fast;
But what cam o'er, I trow, at last,
There's deil ane kens but me.
But soon he wearied o' his dance,
O' a' his jumpin' an' his prance,
An' confess'd without romance,
He was fain to let me be.