to deſtreſſe of hungre. bot like as ſhe wolde flee beſt. then take hede the fiꝛſt day of to moch eetyng. vnto tyme that ſhe be ſtawnchid and afteꝛ that a man may take heꝛ ſich mete as I ſhall tell more playnli here afteꝛ
In what maner and how a man ſhall fede his hawke in mewe.
Loke with wat meetis ſhe hath bene moſt vſed to be fedde and fede hiꝛ theꝛwith .viij. days contynualli. and tho .viij. days yeue hiꝛ biꝛdis Inow. both morow and euyn. and let hiꝛ plomme vppon hem wele. and take caſtyng of the plomage. and that ſhall talawnt hiꝛ wele. and cauſe heꝛ to haue goode appetide. and it ſhall clenſe wele hiꝛ bowillis and whan ſhe is weell clenſed. ye may yeue hiꝛ what meete that ye will ſo it be clene and freſh
¶Bot the beſte mete to make an hawke to mewe mooſt ſone wyth owte any medecyne is the fleſhe of a kydde and of a yong Swanne and of a chikyn. and eſpeciall Ratonys fleſh. ſo thei be not aſſaughte Noon like to hit. and of a yong goos. foꝛ ſich meete is hote of it ſelfe.
¶And take gobittis of grete freſh Elis. and ſpecialli the colpon next the Nauell. and weete it in hot blode of moton. it is goode to make heꝛ to mewe. bot ſpecialli it ſhall make heꝛ wight afteꝛ hiꝛ ſoore aage.
¶Thees ſayd fleſhes bene goode to mewe an hawke: and to kepe hiꝛ in ſtate bot loke ſhe haue goode plente eueꝛy day. ſo that ſhe Ratheꝛ leue paꝛte then lacke any. and eueꝛy .iij. day let hiꝛ bath if ſhe lyſt
