Page:Gospel of Saint John in West-Saxon.djvu/120

23. Ān þǣra leorningcnihta hlinode on þæs Hǣlendes bearme þone sē Hǣlend lufode.^[1]

24. Symon Petrus bīcnode tō þyson, and cwæð tō him, Hwæt is sē ðe hē hyt big segð?^[2]

25. Witodlīce þā hē hlinode ofer ðæs Hǣlendes brēostum, hē cwæð tō him, Drihten, hwæt ys hē?^[3]

26. Sē Hǣlend him andswarode and cwæð, Hē ys sē ðe ic rǣce bedyppedne hlāf. And þā þā hē bedypte þone hlāf, hē sealde hyne Iudas Scariothe.^[4]

27. And þā æfter þām bitan, Satanas ēode on hyne. Đā cwæð sē Hǣlend tō him, Dō rāðe þæt þū dōn wylt.

28. Nyste nān þāra sittendra tō hwām hē þæt sǣde.^[5]

29. Sume wēndon, for þām Iudas hæfde scrīn, þæt sē Hǣlend hit cwǣde be him, Bige þā þing be ūs þarf sȳ tō þām frēolsdæge; oððe þæt hē sealde sum þing þearfendum mannum.^[6]

30. Đā hē nam þone bitan, hē ēode ūt; þārrihte hit was niht.^[7]

31. Þā hē ūt ēode, and sē Hǣlend cwæð, Nū ys mannes Sunu geswutelod, and God ys geswutelod on him.

1. Corp., leornig-, A, B, C, leorning-; A, hlynade; B, C, bierme; Corp., B, C, þæne, A, þone.
2. A, C, simon; A, þyssan.
3. A, breoston.
4. Corp., B, C, þæne, A, þone; A, hyne sealde (changed order).
5. A, þæra.
6. A, byge; C, þierf.
7. Corp., B, C, þæne, A, þone; A, þærryhte.