child through his venym / and when the labourer cam fro the feld / and that he came before the repayre or dwellinge of the ſerpent / he fond his ſonne whiche laye doune deed on the erthe / Thenne beganne the ſayd labourer to crye with a hyghe voys / as he that was ful of ſorowe and of heuynesse ſayinge ſuche wordes / Ha curſed & euylle ſerpent / vermyn and fals traytour / thow haſt deceyued me / Ha wycked and deceytfull beeſt / ful of all contagyous euyll thow haſt ſorowfully ſlayne my ſone /
¶ And thenne the ſerpente ſayd to hym / I wylle well / that thow knowe / that I haue not ſlayne hym ſorowfully / ne withoute cauſe / but for to auenge me of that / that thow hurteſt me on that other daye withoute cauſe / and haſt not amended hit / Haſt thow now memorye / how ofte I ſayd to the / that thow ſholdeft not byleue hym / to whome thow haſt done eyyll / haue now thenne in thy memorye / that I am auengyd of the /
¶ And thus this fable ſheweth how men ought not to byleue ne bere feythe to them / to whome men hath done ſomme harme or euylle.
